ए‌सएलसी पूरक परीक्षामा ६५.२१ प्रतिशत पास

काठमाडौं: यस वर्षको प्रवेशिका (एसएलसी) को पुरक परीक्षामा ६५.२१ प्रतिशत विद्यार्थी उत्तीर्ण भएका छन्। परीक्षा नियन्त्रण कार्यालयले आइतबार नतिजा सार्वजनिक गरेको हो। नतिजा अनुसार परीक्षामा १ लाख २० हजार ३ सय १७ जना सहभागी भएकोमा ७८ हजार ४ सय ५३ जना उत्तीर्ण भएको परीक्षा नियन्त्रक विष्णु वहादुर द्वारेले बताए। उनका अनुसार परीक्षामा सहभागी ६५ हजार ३ सय ७८ जना छात्रामध्ये ४१ हजार ६ सय २२ जना उत्तीर्ण भएका छन्। नतिजा अनुसार प्रथम श्रेणीमा २ हजार एक जना, दोस्रो श्रेणीमा ५९ हजार ८६ जना र तृतिय श्रेणीमा १७ हजार ३ सय ६६ जना उत्तीर्ण भएका छन्। २ सय ४४ जनाको परक्षिा स्थगित गरिएको तथा ४८ जनाको रद्द गरिएको परीक्षा नियन्त्रक द्वारेले बताए।